Abakugu mu kujjanjaba kookolo batongozza ekibiina ekibagatta

BAKAKENSA okuli n'abasawo abakugu mu kujjanjaba abalwadde ba kookolo owa buli kika mu ggwanga batongoza ekibiina ekipya mwe beegatidde n'ekigendererwa ekyokwongera okugatta obwongo , okunoonyereza saako n'okusala entotto ku ngeri empya ey'okujjanjabamu abalwadde ba kookolo abeeyongera kumpi buli lunaku .

Ekibiina kino kituumidwa ' Hematology and Oncology Society of Uganda ' nga kitongozeddwa Minista w'ebyobulamu Dr. Jane Ruth Aceng mu lukung'aana ggaggadde oluyindidde mu Kampala.

Minista Aceng bwe yabadde akwasa akulira eddwaliro ly'e Mulago Rosemary Byanyima awaadi emusiima olw'obuweereza obulungi

Aceng agambye nti obujjanjabi bw'abalwadde ba kookolo bwongeddwaamu nnyo amaanyi yadde nga wakyaliwo okusomoozebwa , bw'atyo n'alagira aba Uganda Cancer Institute obutasirika busirisi wabula bongere okuvaayo okutegeeza bannansi wa we batuuse mu kwang'anga ekirwadde kino basobole okuddamu essuubi.

Dr. Henry Ddungu omusawo omukugu eyeebuzibwako mu kujjanjaba endwadde z'omusaayi e Mulago akkaatirizza nti okwegatta gemaanyi nga basinziira mu kibiina ekitongozeddwa, beetegefu okwang'anga endwadde ezenjawulo. 

Akulira awajjanjabirwa abalwadde ba kookolo e Mulago ku Uganda Cancer Institute, Dr. Jackson Oryem yategeezezza nti bakyalina okusomoozebwa kw'abakugu abajjanjaba abalwadde ba kookolo okubeera nga bakyali batono mu ggwanga bw'atyo n'akubiriza abasoma obusawo okwettanira okukuguka mu kujjanjaba abalwadde ab'ekika kino .

Oluvannyuma balonze obukulembeze bw'ekibiina kino nga Dr. Henry Ddungu ye yalondeddwa ku bwapulezidenti.